Tuesday, April 17, 2007

جواب لنفسي

عزيزي عمر

فجر يوم جديد طالع علينا واحنا مع بعض، من 24 سنة وأكتر واحنا ما بنتفارقش زي المقدر والمكتوب أو زي ماتقول العمل الردي، المهم يا صديقي العزيز ان في الأول وفي الآخر مالناش غير بعض ولو اتخليت يوم عنك حتكون دي بداية الضياع

ببص النهاردة يا صديقي لقيت فيه حاجة ضاعت في الطريق.. سيبك من راحة البال.. انا عمري ما كنت بادور عليها.. فاكر زمان من كام سنة.. او من كام شهر.. كان فيه حاجة اسمها كرامة.. يااااااااه تصدق الكلمة دي بقت بتضحك؟ جرب تقولها في الشارع كدة حتلاقي ألف من يهزأك. المهم يا زميلي انه في يوم الأيام انا وانت كان عندنا من الشيء دة.. متعرفش والنبي ياخويا دة بييجي من ايه؟ المهم انه خلاص يا حلو.. مابقاش.. فاكر الحاجة الرخمة دي اللي كانت بتخليني اقوم منطور من مكاني لما سيادتك تعمل حاجة كدة ولا كدة واقلك: عيب يا ولد.. مايصحش.. خليت ايه للجرابيع؟ خلاص ما بقاش.. لا بقيت باقوم ولا باتكلم ولا بهش ولا بنش.. عارف ليه يا صديقي؟ لأني اتخليت عنك وسلمتك لغيري، سبت ناس غريبة هية اللي تمشيك: اللي يقوللك روح جامع واللي يقوللك روح كنيسة... وفي الغالب يا زميلي كان بيقولك روح خمارة.. امبسط يا عم الحاج وهيص هو حد واخد منها حاجة؟ انت محتاج الأصول والكرامة والكلام الحمضان دة في ايه؟ يعني دة حينفعك لما تموت من الجوع؟ انت محتاج إله في ايه؟ انت برده مش بتقول انك جامد وبرم؟ وبعدين يا عم الحج انت هنااااك مش هنا! الكلام الفاضي دة بيمشي في البلاد الكحيانة بس

المهم يا صديقي انك تسمع دة وتصدق دة وفي الآخر تلف وترجعلي.. بس في الطريق ضاعت حاجة.. ويا عالم حاترجع ولا لأ.. بيقولوا يا عمر ياخويا ان اللي انكسر بيتصلح، صحيح لو انكسر كرسي مثلا ولا حيطة ولا حتي نافوخك ممكن يتصلح، بس تفتكر البني آدم اللي انكسر ممكن يتصلح؟ فاكر لما كان لينا إله فاهمنا وفاهمينه؟ فاكر كنا فرحانين قد ايه؟ تفتكر بعد فاصل الندالة المتواصل دة ممكن نرجع ونبقي معاه تاني؟ تفتكر ممكن يمد إيدة في وسط بحر الزبالة والوساخات اللي أنا وانت فيه ويشدنا؟ يابني والله دة لو حصل حيبقي جميل عمري ما حنساه.. والا انت ايه رأيك؟ انت ساكت ليه؟ انا عارف انك مقموص مني، انا فعلا استاهل واستاهل كمان ضرب الصرمة.. بس اوعدك يا صديقي اني طول مانا موجود مش حيهدالي بال إلا لما ترجع لأصلك: إنسان
صديقك: عمر

Labels:

9 Comments:

At 4:55 PM, Blogger smraa alnil said...

عمر

عارف اانك وحعتني اوي

ياما في رسايل عايزة اقولها لنفسي برضه

بس اكيد هنعيد اكتشاف نفسنا وهنلاقينا بني ادمين

هجيلك تاني

 
At 2:55 AM, Blogger  بسمه عبدالباسط said...

ياه كلامك بجد مؤلم
فعلا هيا الكرامة راحت فين صدقنى هيا موجودة بس أحنا اللى بقينا بننسى
وصدقنى أحنا ممكن نكون أحسن ونرجع أحسن من الأول بالأرادة والعزيمة

 
At 4:58 AM, Blogger hesterua said...

الله
انا كنت بعمل كده زمان

 
At 7:22 AM, Blogger Memo said...

معلش الكومنت ده مش ليك دا لنفسك اللي هيا مش انت يعني لعمر تاني غير عمر الاولاني الي كاتب البوست الاساسي عمر اللي انا قصدي عليه
اللي هوا ده
لا لا مش انت خالص

 
At 1:49 PM, Anonymous Anonymous said...

عمر:
حمداً للة على سلامتك يافتى ، و كل سنة و أنت طيب بمناسبة عيد ميلادك ، أنت عارف أنا أنا فهمي على أدي و مابفهمش كلام الفلسفة المكلكع بتاع سعادتك دة.

في أيةبس يا مان ؟ مين مزعلك فكك كدة و مايبقاش لونك حزايني يا فسواني ، يعني أية الكرامة ضاعت و الكلام دة ما أعتقدش أن واحد زيك ممكن يتخلى عن كرامتة .

و بص لكل حاجة على أنها تجربة و خبرة بنتعلم منها في الحياة .

و أذا كنت أخطأت فاللة غفور رحيم .
صلي على النبي بس .

 
At 8:36 PM, Blogger smraa alnil said...

عمر

لكل منا اخطاء ونزوات لا يعلمها الا الله
المهم اننا نكون زي ماعملت كدة
عرفت غلطك وحدودك

زي ماقالك سمسم ان الله غفور رحيم

عارف

زمان وانا صغيرة كنت شايفة نفسي بريئة اووووووووووووووي
وطفلة اوي
وكنت لوحدي اوي برضه
مش عارفة انا كنت بعمل ايه او رايحة فين
اتولد عندي شعور بالذنب تجاهاي شئ
يعني لو قامت حرب عالمية تالتة مش بعيد احمل نفسي ذنب اشتعالها

بالتلي حيت اني اتغيرت وابتديت احس اني غلط
كرهت نفسي لابعد حد
بقيت اعمل زيك بكلم نفسي واحيانا لا يخلو الموضوع من شتيام ليا واحيانا ضرب
:)

بس اكتشفت في الخ ان ادراكي لحقيقتي ساعدني كتير في اني اتقبلني زي مانا واغير من الشئ اللي تاعبني واللي غلط فيا

مش عايزة يكون كلامي متكرر

بس احضن نفسك يا عمر
وحب نفسك زي مانت كدة
لملم نفسك واحضنها اوي
مش في حد هيحس بيك اد مانت هتعمل كدة
وربنا يزيح عنك كل هم يارب

 
At 8:37 PM, Blogger smraa alnil said...

مش كنت اعرف ان عيد ميلادك امتي
بس كل سنة وانت طيب يا مان
هابي بيزي يويو
هابي بيزي يويو

سيبهاعلي الله بقي
وعلي فكرة
اي شئ دلوقتي بيتصلح لما يتكسر
الا حاجتين
قلب ونفس الانسان

اوعي تكسرهم

 
At 9:02 PM, Blogger تمر حنه said...

جرى ايه يا سى عمر (التانى مش انت)!ا
اللون الحزاينى ده مش تومام و انت هناك و بعيد عن أحضان الحبايب .. انت عمر الجميل (انت مش هو)!ا و هتفضل جميل بدليل ان لسه صاحبك اللى معاك صاحى و مامتش.
و حيات أمى زعلانة منك .. بقى هو انت عيد ميلادك 17 ابريل؟ انا كان 17 أبريل و لا جيبت و لا بوست أيد خالتك .. على فكرة الأيجار بتاع منظمة يالهوى يانا ياما مكسور بقاله أربع تشهر و لازم تيجى تتصرف ..
خالتك

 
At 9:15 AM, Blogger الملاح التائه said...

عمر
اللي راح ما هايرجع تاني
ده كلام الست
وفيه كلام تاني
متفائل شويه
ان مافيش حاجه اسمها مسحيل
أعظم عصور التاريخ هي عصور الإيمان بشئ عظيم وأسفلها عصور عبادة الذات واللذات
تفتكر فيه شئ عظيم؟
وتفتكر هانبطل نعبد الذات واللذات؟
أتمنى وتحياتي لتلك الفضفضه الصادقة

 

Post a Comment

<< Home