أنا الواقف في بلكونة
للأسف الشديد لست من الموهوبين في كتابة الشعر، لكن أدعي اني من متذوقي شعر العامية. والأبيات التالية من نظم صديقي الشاعر المصري الشاب طارق قطب
وطارق من شريحة الفنانين المصريين الموهوبين بالفطرة والذين تمنعهم موهبتهم من ركوب الموجة التجارية الطاغية أو الأكثر جاذبية حاليا، ودة أحلي ما فيه. قال عنه أحمد فؤاد نجم انه شاعر ابن حرام وده طبعا لمن يعرف أحمد فؤاد نجم نوع من المديح. من الآخر كدة هذا الشاعر في رأيي هو أقوي شعراء العامية بين الشباب المصري
أيوة أنا متحيز! والقرعة ببتباهي بشعر بنت أختها! بس اهو نموذج من أشعاره قدامكم... اقروه ... وقولولي لو أنا متحيز ولا عندي حق
___________________________________
أنا الواقف فى بلكونة وباصص للسما بعناد
نجوم بتعوم فى ملكوتك انا لأه
مابتحاربيش عشان قوتك انا لأه
رعدك يوم غضب صوتك وانا لأه
هموم بتعوم فى ملكوتى
وبأشقى كتير عشان قوتى
ويوم غضبى....يضيع صوتى
ساعات فى براح برود قاسى ساعات فى الزحمة والزنقة
ولسه بأحب
ورقة غريبة جوايا........ يوماتى تشب
تتشعلق. وتتمدد كما اللبلاب...على قلبى الغريب جدا
وساعة ما الآدان يدن
تزيد الرقة والمنظر يكون خلاب
ولسة باحب
وفرحة غريبة جوايا تخلينى....نافورة حب
تنسم ع اللى بتحبه....وترويه لو يكون عطشان
ولمعة غريبة ف عنيه بتتكون يادوب علشان
لمحت حبيبتى من بعيد ...وعيونها بصالى
ورغم ان التواضع أصل ف خصالى
حسيت بزهو..كأنى فارس جرىء
وبعد لحظة لقتنى...زى طفل برىء
باتنطط وباتشاقى واقول يارب نتلاقى
وأعيش لحظات فى ملكوتها
وألاقى ان الجمال قوتها
واسمع اسمى أنا بصوتها
فاحس ان الهموم هانت واحكيها بصفة كانت
واحس كانى متدلع....ومتبتر على النعمة
وفجأة عينى تتطلع وهى بجرأة مسكونة
وأقول للسما بحكمة وانا واقف فى بلكونة
قمرك يا سما سابك انا لأه
برقك موت أحبابك انا لأه
وساعة ما انفتح بابك فى يوم خنقة.............. وأنا بادعى
وانا ساجد........وأنا واجد منتهى الراحة فى كونى ضعيف
وأنا حاسس بلسعة صيف على خدودى
وانا عارف ان ضعفى هو السر فى وجودى
وسر اللسعة فى دمعى وأنا ادعى
ولما دعيت وبابك عدى دعواتى
واهدانى فى يوم آتى بفرحة حبها ليه
بصت لك وأنا حاسس بانى خلاص مانش محتاج
بصت لك وانا حاسس بانى خلاص لبست التاج
وتاجى...حبها لشخصى الضعيف جدا
غريبة....ادان الفجر اهه بيدن
أسيبك يا سما دلوقت
أشوفك بكرة نفس الوقت
وبكرة الحب حيكون زاد
واكون واقف فى بلكونة وباصص للسما بعناد
نجوم بتعوم فى ملكوتك انا لأه
مابتحاربيش عشان قوتك انا لأه
رعدك يوم غضب صوتك وانا لأه
هموم بتعوم فى ملكوتى
وبأشقى كتير عشان قوتى
ويوم غضبى....يضيع صوتى
ساعات فى براح برود قاسى ساعات فى الزحمة والزنقة
ولسه بأحب
ورقة غريبة جوايا........ يوماتى تشب
تتشعلق. وتتمدد كما اللبلاب...على قلبى الغريب جدا
وساعة ما الآدان يدن
تزيد الرقة والمنظر يكون خلاب
ولسة باحب
وفرحة غريبة جوايا تخلينى....نافورة حب
تنسم ع اللى بتحبه....وترويه لو يكون عطشان
ولمعة غريبة ف عنيه بتتكون يادوب علشان
لمحت حبيبتى من بعيد ...وعيونها بصالى
ورغم ان التواضع أصل ف خصالى
حسيت بزهو..كأنى فارس جرىء
وبعد لحظة لقتنى...زى طفل برىء
باتنطط وباتشاقى واقول يارب نتلاقى
وأعيش لحظات فى ملكوتها
وألاقى ان الجمال قوتها
واسمع اسمى أنا بصوتها
فاحس ان الهموم هانت واحكيها بصفة كانت
واحس كانى متدلع....ومتبتر على النعمة
وفجأة عينى تتطلع وهى بجرأة مسكونة
وأقول للسما بحكمة وانا واقف فى بلكونة
قمرك يا سما سابك انا لأه
برقك موت أحبابك انا لأه
وساعة ما انفتح بابك فى يوم خنقة.............. وأنا بادعى
وانا ساجد........وأنا واجد منتهى الراحة فى كونى ضعيف
وأنا حاسس بلسعة صيف على خدودى
وانا عارف ان ضعفى هو السر فى وجودى
وسر اللسعة فى دمعى وأنا ادعى
ولما دعيت وبابك عدى دعواتى
واهدانى فى يوم آتى بفرحة حبها ليه
بصت لك وأنا حاسس بانى خلاص مانش محتاج
بصت لك وانا حاسس بانى خلاص لبست التاج
وتاجى...حبها لشخصى الضعيف جدا
غريبة....ادان الفجر اهه بيدن
أسيبك يا سما دلوقت
أشوفك بكرة نفس الوقت
وبكرة الحب حيكون زاد
واكون واقف فى بلكونة وباصص للسما بعناد
____________________________________
ملحوظة: بما اني خارج القطر المصري حاليا، لم أستأذن الشاعر قبل نشر هذه الأبيات، فأولا محدش يسيح
:)
ثانيا كافة حقوق المؤلف محفوظة لطارق قطب
ثالثا دي مدونة بقي يعني كل سنة وانت طيب وسلملي علي حقوق المؤلف وعلي المتضرر اللجوء إلي القضاء
posted by عمر @ 5:45 AM
45 Comments:
وكمان حرامى يا عمر
والنبى لا هادور على طارق فى كل مكان واقوله انك سرقت القطعه الجميله دى
الظاهر انك تـــأثرت بالراجل اللى رمى نفسه من بلكونه المدونه بتاعتى
شفت بقي إزاي، بلكونة عن بلكونة تفرق يا معلم، دة راجل مرهف الأحاسيس، إنما انت غاوي انتحار وقنابل
أسيبك يا سما دلوقت
أشوفك بكرة نفس الوقت
وبكرة الحب حيكون زاد
اه ده يا عم عمر
جحيم باشا: دة يا ريس شعر... مش بتاعي والله، سالفه وحرجعه تاني
ماشى يا عمر... طب قولى هو فين وأنا هسيحله على طول
:)
لا.. بس بجد هو فنان, غريبة فعلا أننا ماسمعناش عنه قبل كده؟
ذوقك حلو جدا!! انا بحب وقفة البلكونات دى خصوصا لما تكون فى دور عالى قوى... بحس أن أنا مع نفسى فى السما كده ومحدش شايفنى
manal
منال: والله انت اللي ذوقك حلو، أنا مش عارف الحقيقة الشاعر بلكونته كانت في الدور الكام لكن أنا متأكد أنه ما كانش في المساكن الشعبية ولا في الدور الخمسين... وبالمناسبة ما كانش في جيب البيجامة دبابة
:)
ماشى ياعمر
انت ماشى على نظام الكلام ليكى يا جاره..بتلقح بالكلام يا عمر زى حريم غيط العنب
ما شى يا ابو فاروق.. هى يعنى بوسطن بعيده.. دى فركه كعب واكون كاتم على انفاسك فى الجامعه
كل سنه وانت طيب يا عمر يوم الخميس اول سانكس جيفنك لك هنا فى امريكا..
يارب كده تفضل معانا علطول
I don't know what it says.. but the picture is awesome.
يا عم أدينا عملينلك صيت للمنتحر الجبار بتاعك في البلوج حدانا، وأهو كله بثوابه، وكل سنة وانت طيب يا ريس وان شاء الله كدة كل ثانكس وانت جيفينج
Mia: thanks for passing by :)
This is a poem written by a friend of mine in which he talks to the sky about his lover and says that she enlightens his life permanently while the moon sometimes quits the sky :) very romantic!
I don't know why I couldn't upload your photo, it looks like i will need to update to blogger beta.
عندك حق فعلا البلكونة عليها عامل كبير جدا.... كمان مش ممكن يكون هو قاعد فى البلكونة طول النهار لأن مراته- اللى فيه فسفوسة فى وشها- طرداه من الأوضة شر طردة؟
أكيد القنابل والدبابات اللى شايلها فى جيب البيجامة خلصت!! كمان قنابل النابالم اللى لسه شاريها نسيها فى درج الكومود اللى فى الأوضة... الراجل يعمل ايه يعنى.. يقطع نفسه؟ لازم يقعد يكلم نفسه كده لحد لما الصبح يطلع
manal
كمان لاحظي ان السما اللي في المساكن الشعبية ما فيهاش قمر، علشان كدة بيقولها قمرك يا سما سابك
شفت يا رأفتاني، القصص بتاعتك بوظت دماغ الشباب ومبقاش عارف يتذوق الفن الهادف... انا عارف انت ناوي تجيب ضرفها قريبا جدا
يا عمر ما تسمعش لمنال يا عمر
عاوزاك تسخن على يا عم الحاج.. خلينا احنا مع بعض دول عالم اول يا عمر..
وانت يا منووووول ماشى يا ختى..
احذرى الرافتانى من هنا ورايح
تصدقوا انت عيال رخمه اوى..وانامخصامكم
رأفت... صدقنى أنت كده بتلعب فى عداد عمرك
:)
ثانيا عمر هيسخن عليك ازاى يعنى؟ هو أنت بتشتغل بوتاجاز بعد الضهر؟
:)
ثالثا عمر مش طايقك أساسا.. يابنى أرحمه شويه, هيجى يوم وهيسبلك أمريكا دى مخضرة, مش كده يا عمر؟
أنت حر.. أنا مسافرة اسكندرية قريب ومش هسلملك عليها
manal
اه صحيح... و شوف بقى من اللى هيعمل الشاى لضيوفك فى البلوج
:)
manal
جميله جدا و الله من غير مبالغه و حتي لو انت اللي مش كاتبها لكن مجرد انك تنشرها دليل انك فعلا متذوق للشعر و للكلام الجميل و علي فكره انا بحب السما جدا و كمان البحر و القمر الجميل اللي انت حاطط صورته
اولا القصيده جميله
وصاحبك ده فعلا موهوب
ثانيا
انت حرامي مهذب وعندك ضمير
علشان أسندت الحق لصاحبه
ثالثا
انت بتورطني ياعمر وتقول لي امال الغبي اللي بالي بالك لسه قاعد ليه بقي 25 سنه
طيب موش حا اجاوب طول ما انا بره مصر
ولما ارجع ولقيته ابقوا حشوني عنه
بصراحة كلام جميل ويتحس ياعمر
اشكرك على اختيارك وطرحك الرائع لنا
تحياتى
الجدع صاحبك دة موهوب بجد
عقبالك كدة زيه
يحمد ليك انك اشرت للمصدر
واعترافك لوحده بيمنحه حق ملكيته الفكرية يا عزيزى
بس رأفت مجتهد أوى بجد
كل بوست كدة تلاقيه أول تعليق؟؟
هو مش بيشتغل ولا اية؟؟
بقا يعمل زينا فى العالم التالت ويزوغ ويرد ولا اية العوبارة؟؟
شهروزه
ما تلعبيش بالنار زى منال..منال على قائمه الخطف ..انما انتى يا شهروزه.. ابعدى عن الرافتانى وغنى ليه
منال
هو انتى امتى ياختى كنت موجوده علشان تعملى الشاى للضيوف..ادى اللى بنخده من الفلبين
عمر
رود على ام التليفون لما اتصل بيكى يا عم الحاج
مفيش فى امريكا رنات
Shabab, ta7eyati men Omaha-Nebraska where i'm experiencing and authentic Mid-Western thanksgiving experience! Tab3an el computer hena mafihoosh 3araby.
Ma7adesh 3ayez 7aga men Omaha?
قائمة الخطف!! ليه بقى أن شاء الله يا سى رأفت؟! هو أنت شغال مع أسامة بن لادن ولا مع الشيعة اللى فى العراق؟
عندك حق يا شهروزة! ناس فاضية يا أختشى.. تعملى ايه بقى؟
هم دول اللى هيشوهوا صورتنا فى دول العالم الأول... كفاية العنب اللى هو مشغلهلهم طول النهار دى... دول لو فهموها, هيروح على جوانتانامو أن شاء الله
:)
عمر... والنبى ابقى هاتلى 2 كيلو بنجر من نبراسكا.. أصلى سمعت انه حلو هناك.. كمان رأفت طنشنى.. كعادته
:)
manal
manal:
ageblek 7ezmet fegl we shwayet karafs?
منال ورأفت: ياخوانا مش كدة.. عالم أول ولا عالم تالت كله محصل بعضه
أجبلكوا صوبيا؟
نهر الحب: انا سعيد جدا ان القصيدة عجبتك لانك واضح انك من متذوقي الشعر مرهفي الحس. نورتي ومتقطعيش الزيارة، رغم ان المدونة هنا مش دايما شاعرية قوي كدة
:)
مكسوفة: شكلك كدة ناوية تودينا في داهية، انا بتكلم عن النسناس بتاع الجيران اللي بقاله 25 سنة بينط في البلكونة عندنا... متخليش مخك يروح لبعيد
شهروزة: سعيد ان الشعر عجبت وحلوة عقبالك دي بس أنا عمري ما حكتب شعر زي دة في حياتي! أما بالنسبة لرأفت فهو نموذج للشاب المصري المكافح: بيصحي الساعة عشرة علشان يروح الشغل، يقعد علي النت طول النهار وبعدين يروح يتفرج علي أفلام لحد الساعة 3 الصبح
رأفت: معلهش كنت باكل ديك رومي... تاخد حتة؟
تامر: انا سعيد جدا ان الشعر عجبك وأوعدك اني مش حنشر ابداعاتي الشخصية ابدا علشان مابوظش حالة الاعجاب بشعر طارق قطب
:)
بسم الله ما شاء الله
ايه الجمال ده
مش هقول ان طارق احسن شاعر عامية فى مصر علشان مش بحب التعميم
بس فعلا اسلوبه سلس جدا
هو مانشرش حاجة يا عمر ؟
بس سيبك الاحساس عالى عالى
أعلى م البلكونة كمان
بس هو فين المكان اللى شايف منه السما بوضوح كده من غير ماتغلوش عليه عوادم السيارات و لامؤاخذة
تحياتى لطارق
و عشنا و شوفنا حرامى بيعترف كده عينى عينك
هو اللى اختشوا ماتوا و للاايه
لازم نقيم عليك الحد
و الحد بقى ياريس هيكون انك تطلع فى مظاهرة تهتف لمبارك
ههههههههههه
يالهوى مش متخيله احساسك ساعتها
عمر اسم جميل اوى واول مره اجى البلوج عندك
البوست اللى قبل دا عجبنى اوى بس لانى شوفتو متاخر فحبيت اسيب الكومنت فى اخر بوست
موضوع جميل ميحسوش الا اللى اغترب عن بلدو
ربنا يوفقك ويرجعك بالسلامه
عمر
انت فين يا بنى لسه فى نبرسكا؟؟
انا بس باطمئن عليك زمان تلحت من الوقفه فى البلكونه..والجو اليومين دول برد اوى
كات أيز: ألف شكر علي الكلمات الرقيقة، مدونتك أيضا غاية في الرقة
تحياتي
رافت: بيقولك في موجة برد جاية من القطب الشمالي، ابقي البس فانلة خلف خلاف
أنا حرة: حرام عليكي.. اهتف لمبارك؟ هوة مفيش زيت خروع في البلد ولا إيه؟
انت كمان عايز تختار عقابك بنفسك
هزلت
" وش واحدة بتطلع لسانها "
انتي أمن ولا ايه الحكاية بالضبط؟
"وش واحد بيلطم علي وشه
:)
عمر... حمدلله عالسلامة!! جبت البنجر؟
بجد افتقدناك... وياريت تغير البوست بقى علشان احنا تكتكنا من الوقفة فى البلكونة
:)
manal
منال: كيف الأحوال؟ جبتلك معايا صينية قرع
:)
سلامتك من التكتكة، بس الحقيقة مش لاقي حاجة أكتبها في عز الزنقة اللي انا فيها دي.. الامتحانات قربت وركبي هي كمان بتتكتك
:)
عمر
كمان حصلت تشتمنى و تقول عليا أمن
لا هزلت
" وش واحدة بتعملك هوريك بس لما تيجى مصر ابقى اتشاهد "
أنا حرة: يانهار أسود... ايه هوريك دة؟ انا اتشاهد من دلوقتي أحسن
اللللللللللللله
شعر جامد جدآ ماشاالله
ليه منشرتلوش حاجة تانية؟
القصيده حلوووه جداااا ،،اختيار موفق انا كنت بدور على قصايد لطارق على جوجل طلعتلي مدونتك وهوه نزل
ديوان على فكره اسمه لو راجل زي ما بتقول وباين عليه شاعر ممتاز ..
تحياتي ليك وأنا بردو شاعره "على قدي يعني" أتمنى تزور مدونتي وتقرأ قصيدتي علها تنال إعجابك..
القصيده حلوووه جداااا ،،اختيار موفق انا كنت بدور على قصايد لطارق على جوجل طلعتلي مدونتك وهوه نزل
ديوان على فكره اسمه لو راجل زي ما بتقول وباين عليه شاعر ممتاز ..
تحياتي ليك وأنا بردو شاعره "على قدي يعني" أتمنى تزور مدونتي وتقرأ قصيدتي علها تنال إعجابك..
http://ma7laky-yabaladna.blogspot.com/
جميل جدا الاستاذ طارق قطب جميل جدا وشكرا على سرقتك القصيده بتاعته وده دليل انك مش حرامى اي كلام ههههههههههه دى مش سرقه بس فعلا طارق قطب شاعر موهوب جدا
Post a Comment
<< Home