..نفسي
عمر حد فيكم سأل نفسه هو عايز إيه دلوقتي حالا؟ في التو واللحظة.. ايه الشيء اللي ممكن يخليك سعيد ومرتاح وملك زمانك؟ أحلي حاجة في السؤال دة انك تسأله لنفسك علي غفلة.. وانت مش واخد خوانة يعني.. وأوعدك ان الإجابة حتدهشك
..أنا عن نفسي حلعب اللعبة دي دلوقتي
أنا نفسي دلوقتي حالا.. أبقي في ميدان رمسيس، الساعة 10 بالليل.. قدام الجامع.. البشر كلها في الشارع.. مستني ميكروباص رايح عباس العقاد ممكن ييجي وممكن مايجيش.. وممكن ييجي ويتملي ويمشي.. ماتفرقش كتير.. المهم اني في ميدان رمسيس قدام الجامع الساعة 10 بالليل.. وانا جزء من الكتل البشرية والضجيج.. في إيدي اليمين سندوتش فول حباياته صحيحة والطحينة كتير باحاول اني أكله من غير ما اوقع حباية علي الأرض.. وفي الإيد التانية الورقة اللي كان ملفوف فيها السندوتش مع سندوتش طعمية كلته قبل كدة ولسة فاضل في الورقة شوية طرشي.. مية الطرشي بتقع علي إيدي الشمال.. الجزر ناشف وطعمه حلو لكن اللفت طري أوي ولونه غامق شوية.. ممكن يكون بقاله ست شهور في البرميل.. المهم إني باكل اللي يطلع في إيدي وبستنشق التراب.. تطلع في إيدي خياراية واحس اني النهاردة محظوظ، الخيارة صغيرة لكن حاكلها علي قطمتين.. اخلص السندوتش والطرشي وأكور الورقة كويس اوي واحشرها وسط الحديد بتاع سور الجامع.. أسيب موقف الميكروباص واعدي الشارع بالراااااحة جدا، العربيات ماشية في كل اتجاه وبتتفاداني وبتخانق بعضها وبتخانق الطريق.. انحشر وسط المحلات والسور الأخضر المتهالك اللي علي طرف الرصيف.. اشم ريحة قش القصب واسمع صوت المكنة العالي جدا.. شابين في البوتيك مشغلين ماتش مصر واليابان ومش بيتفرجوا، بيتكلموا عن الملل بعد الجواز.. وراجل عنده حوالي خمسين سنة لابس قميص وبنطلون محترمين وملمع الجزمة قاعد علي الكرسي علي الرصيف.. ما جالوش غير زبون واحد النهاردة لكن الفرجة علي اللي رايح واللي جاي والناس المحشورة في محطة المترو أهم.. مية الطرشي نشفت بسرعة من علي إيدي وحاسس بشوية ملح في إيدي الشمال.. انفض إيدي في البنطلون الجينز.. الفول والطعمية نفخوا كرشي شوية والبنطلون بقي مضايقني.. نفسي كمان بقي قصير شوية.. عيون مش خايفة تبصلي ومبتزعلش لما أبصلها نظرة ملهاش أي معني.. أعدي جنب مدرستي القديمة.. مظلمة وكئيبة كالعادة.. منعزلة تماما.. في الداخل شايف صلبان وتماثيل وسط الظلام.. وكلام لاتيني مش فاهمه.. لكن الجدار الخارجي للسور مصري تماما ولونه سيمون ومكتوب عليه باسبراي أحمر "أديب الشباب محمود عبد الرازق عفيفي.. سيدي المسيح.. عفوا" لكن انا عارف ان الجدار من الداخل لونه رمادي.. كأن المدرسة تقاوم زحف المجتمع عليها.. حتي المبني هو الوحيد في الشارع اللي مبني بالورب مش بحذي الشارع.. محل البامبو قافل لكن فيه عيال بتلعب عالسلم وعاملة هيصة.. بعدت اوي عن محطة الميكروباص ومفيش اي مواصلة قريبة ممكن توصلني.. ومكسل ابص ورايا علشان اشاور لأي ميكروباص جي لأنه أساسا حيكون مليان.. بس المهم اني في شارع رمسيس الساعة 10 وتلت وماشي.. الهوا المكتوم جزء من رئتي وضجيج العربيات والأتوبيسات جزء من وداني.. وماشي.. ممكن أوصل وممكن موصلش.. لكن مش خايف.. لأني لو ما وصلتش عارف اني ممكن انام علي الأرض.. وافرد دراعاتي ورجلية.. وأغمض عنيه.. وأموت
posted by عمر @ 8:45 AM
95 Comments:
نفسي اخرج الساعه 3 الفجر
بليل الدنيا ضلمة اوي
مش فيها غير ضي القمر
الشوارع فاضية
نازلة منطقتي الراجل الفطايري اللي ادامن بيبصلي نظرة غريبة بديله ابتسامة واقوله مساء الخير
امش لحد ما الاقي نفسي في حتة واسعه مش مهم الحتة دي فين
مطرح ما توديني رجليا
الدنيا ساقعه بس انا مستمتعه اوي
ابص حواليا الاقي نفسي لوحدي كالعادة
اخلع حجابي وافرد شعري
الهوا يجيبوا يمين وشمال زي الدنيا ما بتعمل فيا
افتح دراعاتي وابص للسما واغمضض عيني
وانام في وسط الشارع
وساعتها برضه هكون مت
نفسي احس بالامان
نفسي الاقي بيتنا فيه حب ودفا
نفسي الاقي اهلي
نفسي
نفسي في حاجات كتيرة اوي يا عمر
وكلها بتمناها في نفس اللحظة
نفسي افرح
حاجات كتيرة اوي رغم معرفتي انها شبه مستحيلة بس نفسي فيها
وبتناساها لانها بتجرحني اوي
بس انت بقي فكرتني بيها
والنبى يا عمر ابقى خد سمــراء النيل معاك ويا ريت ما ترجعش تانى امريكا
احه بجد..طرشى ايه وخيار ايه ياوريث..
-----------------------------------
انت عارف بأه يا صديق انا نفسى فى ايه
اكون قاعد ع البحر فى اسكندريه والدنيا بتروخ شتا..
واسكندريه ما يكنش فيها ولا نمره عربيه ملاكى القاهر
واخوك الرأفتانى ضارب 3 اكسبرسوا من البن البرازيلى فى محطه الرمل ومولع واحده مالربور ابيض من بتاعنا هنا االخالى من الخشب
واتمشى من محظه الرمل لبحرى.. وانا على مداخل بحرى..
اشوف مدنه المرشى ابو العباس منوره كده..
وقدام المرسى ..اروح على قهوه فاروق اشرب واحد معسل قص تمام...
وعند القهوه فى عربيه كبده اسكندرانى
اخبط واحد كبده بلدى
واتمشى تانى ع البحر ..
لا افكر فى مذاكره ولا افكر فى شغل ولا افكر فى اى حاجه
واسمع سلام
من بحرى و بنحبوه
وازاى نقدرو ننسوه
شبك الجمالات وشبكنا
وازاى نقدرو ننسوه
ايوووه...ايوووووه
اى خدمه يا صديق
يا شباب
ادعوكم لدعم حملة رد الاعتبار لانتفاضة يناير الشعبية عام 1977
إيدكم معانا يا شباب
سمراء: بجد تعليقك جميل.. أي حاجة تفتكريها حطيها في كومنت علي طول
وعلي رأي المثل: المدونين لبعضيها، وان شاء الله يوم ما نتشد كلنا مش حيبقالنا غير بعضينا برده.. بس للأسف مش حنكون في نفس الزنزانة
:)
ولا يا رأفت، انت شوفت البن البرازيلي بعد ما جددوه؟ بقي شبه كنتاكي ههههههههههه
ما بقيتش احب اروحه من بعد ما دخل عصر العولمة وطردوا طقم العواجيز اللي كان شغال فيه وعينوا شباب خريجين معهد كوم الشؤافة للسياحة والفنادق
ياااااااااااااااااه
اد كده يا عمر مصر وحشاك
ايه الاحساس اللى بتكتب بيه ده كله ؟
_______________-
بس انت بكرش يا ريس و للا ايه ؟
____________
و بلاش تزنق الورقة فى الحديد ابوس ايدك ارميها فى اى سلة زبالة هتقولى مفيش فى الشارع احتفظ بيها لحد ما تروح بيتكم و ارميها
_________________-
عمر
مصر بتسلم عليك اوى
و مستنياك
رأفت
مالهم بتوع القاهرة قارفينك فى ايه ياعم
و للا اكمنهم زاحمين اسكندرية
هو البحر بتاعك لوحدك
ايه البواخة دى
لا يا عمـــــــر بتــوع البن البرازيلى لسه زى ما همه يامــان انا كنت هناك فى شهر ابريل اللى فات..
يا سلام يا ولاد الدنيا بتتغير بسرعه كده وما عدش فيها خير
-----------------------------------
انا حــــــره
ايوه ياختى بتوع القاهره بيجو يخنقونا ويمشوا ويرموا ورق فى الشارع
ياريت يعملوا قانون مممنوع دخول الاغراب
ممممممممممممم
سؤال مش لذيذ و بيوجع رغم بساطته
نفسى فى ايه دلوقتى حالا بالا حيو ابو الفصاد
؟
نفسى المطرة تمطر و انزل اجرى تحتها و بعدين افضل اجرى لحد ما اوصل اسكندرية و اقف قدام البحر عند بير مسعود كده و اخد شهيق جامد اوى اوى اوى و انط فى المية و بعدين اطلع تكون الشمس طلعت و امشى ع الشط و نور الشمس ينشفنى
و اغنى بصوت عالى قوى و بعدين البحر يضحكلى ويقولى خليكى شوية و ما اروحش ابدا
_______________
ممممممممممم
ايه الحلم المستحيل ده
ممكن مبدأيا نفسى اخد شنطتى و اروح اسكندرية
نفسى ازور اسكندرية فى الشتاء ياجدعان
فايتنى كتير و المصحف
________________--
نفسى تيتة " الله يرحمها " تيجى و تحضننى جامد اوى
__________________
نفسى حد يضحكنى من قلبى بجد
اضحك بصوت عالى لحد ما اقول قلبى وجعنى من كتر الضحك
ينفع اجى تانى لما افتكر حاجة ؟
أنا حره
رحمه الله على جدتك وجدتى انا كمان
-------------------------------
احنا مش قلنا بتوع القاهره ملهومش دعوه باسكندريه..
هى تناحه يا جدعان وخلاص
نعمل ايه بأه نردم البحر علشان نرتاح من قرفكم
ما عندكم مارينا ونهر النيل ...
وخلاص ياختى اخدتى فرصتك ..هو فرح..كل ما تفتكرى حاجه تيجى
لا يا رأفت بتهرج
محدش يقدر يرمى قشة فى اسكندرية و الا يبقى معندوش دم
يعنى اسكندرية بتبرق
ما تعممش بقى
بس انا نفسى على فكرة بتخنق من القاهريين فى اسكندرية فى الصيف
يالهوى يا جدع بيبقى زحمة و لا يوم القيامة
نفسى اروح فى الشتا يا ناس
نفسى اكل ايس كريم فى ديسمبر هناك
نفسى اعيش هناك بقى
يا رأفت انا بحب اسكندرية
اسكندرية و بس
و الكل يعرف عنى كده
يعنى مش بحر
بحر اسكندرية بقى زبالة اصلا و مايتشافش
بس فى روح فى اسكندرية فى هواها بتلمسنى
ايه البواخة بتاعتك دى
هى اسكندرية بتاعتك
روح بقى مش عايزة اكلمك تانى
يووووووووووووووووووووه
ايه يا عم رأفت هو الموضوع بتاعك بقى
ايه اخدت فرصتى هو انا مقدمة فى ستار ميكر يا عم
فين عمر يقول حاجة و للا اسيبلكم البلوج و اطفش يعنى
" وش واحدة بتنفخ اوووووووووف عليكم "
خلاص يا انا حـــره
امسحى دموعك
انا احترمت فيكى حبك للمدينه الساحره
وطالما فعلا انت بتحبى اسكندريه فى الشتا
يبقى انت بتحبى اسكندريه بجد
كنت بأفكر ابقى محافظ اسكندريه مع الرئاسه؟ ايه رايك؟
يا عم رأفت انت حي تخنق عالناس عندي؟ دانت راجل خانقة صحيح
قولنالك يا عم الحج البن البرازيلي ركب لامبات نيون وبقي شبه فروج فقيه المشوي
والشعب الاسكندراني الشقيق كله قاعد يهرش في..... راسه.. في البن البرازيلي
أنا حرة
انت منورة البلوج.. والله لو مشيتي لاقفل البلوج اموت الواد رأفت
!وعموما انت حرة
يا عم عمـــر
ما هى ماسكه فى اسكندريه بايديها وسنانها..
وانا خلاص قلت ماشى
المهم موضوع البن البرازيلى ده قلقنى يا مان
هاعمل ايه انا لما انزل؟؟؟
هوة القهوة بتاعته لسة زي ما هي.. بس الأمبيانس هو اللي مش عاجبني
ممكن لو بتقرف تجيب معاك كيس بن ستارباكس وقضيها اسبرسو
قهقهقههقه
(دة بمناسبة القهوة)
كــويس انك قلت لى الموضوع ده..
فعلا..انا كده مضطر انى اجيب الخزين بتاعى معايا
على فكــره الراجل بتاع انتفاضه الشعب ده الاستاذ شريف النديم
طلع ما بيحبش السادات
ربنا يستر
هو لازم لواحد يستخدم سلاح المرأة الفتاك بتاع القمصة علشان تتعدلوا
ايوة يا رأفت بحب اسكندرية حب حكيكى
و تمسك الرئاسة مع محافظ اسكندرية
انت اشتريت البلد ده جيمى ارحم
حتى هيملالنا البلد شباب من عينة شباب الجيل قوام بينا هووو هووو
ايوه يا عمر
قوله يا اخويا
هو اشترى المنطقة
ده بيمارس سلطته من قبل ما يمسكها
شكلى هكهربلك السلطة
___________
عمر
كلمة انتى حرة بتاعتك مش مريحانى
مدية على الباب يفوت جمل
ماشى ياعم
ماتخلينيش ادعى عليك لما تيجى رمسيس ما تلاقيش ميكروباص العقاد
ايه يا عمر الأمنية العجيبة دى... فول وطورشى وميكروباص... شكلك مش هتجيبها لبر وأنت فى أمريكا.. ربنا يستر
أجمل حاجة عجبتنى فى البوست ده اخره... وأموت
يا سلام عليك!! فعلا أجمل أمنية ممكن الواحد يتمناها
وبالنسبة ليا.. نفسى أكون فين دلوقتى؟
نفسى أكون فى أى حتة غير اللى أنا فيها دلوقتى... أكون مع ناس غير اللى اعرفهم دلوقتى.. أتكلم كلام غير اللى أنا بتكلمه دلوقتى
حد فهم حاجة؟
اللى يفهم يبقى يقولى
manal
ربنا يسامحك يا عمر نكدت عليا على المسا :(
الموقف عجبنى و التفاصيل اديت للموضوع الحميمية نقلتنى من اوضتى لميدان رمسيس بكل ما يمثل الحياة المصرية
انا بقى نفسى يرجع بيا الزمن لايام الكلية احد ليالى الشتا الساعة 8 مساءا بعد يوم طويل من المحاضرات و اخر سكشن باة و احنا مفيسيين و بقالنا 4 ساعات محبوسيين فى المعمل و نفسنا نروح و فجاة يجى فى بالي اننا نتمشى من كلية فى القصر العينى للتحرير و بعد نقاش و اتهامى انى مجنونة نشد الرحال و كل واحدة شايلة شنظتها المليانة ادوات و الكتب و البالطو على كتفنا و نمشى على النيل و الهوا فى و شنا بس مستحملين كل واحدة بتتكلم عن احلامها بعد التخرج و نعدى على ميرديان و نشوف الشيراتون و نحلم اننا عملنا فرحنا هناك و نبص بغيظ على الكوبلز القاعدين يحبو فى بعض ونحاول نعدى الشارع و لا كان فى عربيات ما هما اللى يحاسبو باة و نعدى على جامع عمر مكرم و نتفرج على العزاء و الراجل ربنا يرحمه كان شاكلة حاجة كبيرة فى البلد و نوصل للتحرير نفضل مستنيين ال CTA
و ييجى متاخر كعادة الموصلات المصرية و نروح على 10 و مفيناش نفس
و كمان لما ...
ولا كفاية كده
فكرتنا بالذى مضى يا سى عمر
بس المقالة تحفة و ترجعلنا بالسلامة و حنعزمك على الفول اللى انتا عايزه
يااااااه يا عمر كلامك ووصفك حلو بس تعرف بقى لو معاك عربية والساعه 3 4 الفجرية وتاخد كوبري اكتوبر بعد العشوة دي ولا تنزل سيدنا الحسين وتدخل الحواري اللي وراه وتشم ريحة الحيطان والرطوبة وبقايا العطارة وزبالة اليوم كله وتلاقي لك كام كلب ضال على كام قطة يتيمة اوه فانتاستيك انا باحب جدا اعمل كده بس بجد اللي نفسي فيه دلوقت صعب جدا جدا جدا
نفسي اشوف بنتى الكبيرة اللي ماتت واخدت كل احلامي معاها وسابتني افكر هاحلم ازاي من جديد صعب قوي انك تفقد حلمك
منك لله فكرتني ليه ؟؟
أنا حرة: ايه سلاح القمصة دة؟ لعلمك احنا رجالة جامدة اوي ومابناكلش مالكلام دة! ولا ايه يا زعيم؟
وبعدين تدعي عليا ليه انا مالي؟؟ مش انتي اللي بتقولي انك حرة؟ خللاااااص انتي حرة!
:)
تصدقي يا منال انا كان قلبي حاسس انك حتسيبي ام البوست كله وتمسكي في حكاية الموت دي! لا حول ولا قوة إلا بالله.. يا بنتي كدة مش كويس علشانك.. طيب اجبلك خروف تدبحيه يمكن تتحل عقدتك؟
وعموما اللي فهمته من الكلمتين بتوعك انك مش طايقانا وعايزة تدوري علي ناس أنضف.. وبالتالي انا شايف ان احنا نعدمها هي كمان يا زعيم
ما علينا: بجد انا مبسوط جدا ان البوست عجبك.. حكايتك الصغيرة دي جميلة جدا
:)
وبعدين انت بقي ما صدقتي ان انا نفسي في الفول فقولتي تسترخصي؟ طب خليها محشي
:)
المزجانجي بنفسه عندنا؟ يا دي الهنا! والنبي بلاش تغيب عننا كدة احسن زيارتك بجد بتبسطني قوي
طبعا لو قلتلك ربنا يصبرك يا حتقول دة كلام فض مجالس يا حتشتمني.. بس من تجربتي المتواضعة في الحياة ان الحلم اللي بيضيع صحيح ما بيرجعش وبيفضل معلم في القلب، لكن طول ما الواحد في الدنيا دايما في امكانية انه يلاقي لنفسه حلم.. وممكن يكون الحلم الضائع هو الدافع أو الملهم أو العبرة او المحرك، وربنا زي ما خلق الإنسان قادر يخلق له سبب يعيش علشانه..
ما علينا
فكرتينى بايام الكلية
و ياسلام لو ماشيه و معاكى الميكرسكوب و ايدك واجعاكى او ال buritte
ياااااااااااه كانت ايام
عمر سلاح القمصة ده فتاك
و انا حرة فعلا خلاص ارتحت كده
:(
منال
ليه كده يا ستى
يعنى ايه عايزة ناس غير دول
احنا كاتمين نفسك للدرجة دى ؟
ربنا يسامحك
برضة قاعدين معاكى غصب و اقتدار
Ironcobra معاكم , أية ياجدعان أم الفقر و الملل اللي أنتم كلكم عايشين فية دة , أية ياعم عمر ميدان رمسيس و سندوتشات فول محصول و طعمية مفتوتة و مية طرشي فية أية يابا هو دة اللي وحشك ي مصر أمال لو مكنتش خريج العائلة المقدسة كنت حلمت بأية ؟ و سمراء ألنيل يفولك أخرج الساعة 3 الفجر و الأخ مزاجنجي يقولك ريحة المجاري و الزبالة ورأفت هوة كمان , و بعد كدة تخش الأخت أنا حرة و تقولك مصر بتسلم عليك أوي يا عمر حسستني أن أحنا في مسلسل رأفت الهجان .
بس عارفين بأة أنا نفسي في أية أروح أحلق عند مصطفى أو محمد في الضاهر و نطلب سندوتشات كبدة و سجق من عند رضا أو سمين من عم محمد و بعد كدةشاي كشري في من قهوة الضاهر في كوبايات ملحوسة .
Ironcobra
يأ رأفت : أنت طلعت مش صاحب مزاج بأة عارف لية لأن المارلبورو المصري الأبيض لايعلى علية خدها كلمة حق ( و أنت عارف أني دايما بأقول الحق) من و احد داخخني قديم ( دخنت حوالي 12 سنة و مبطل بقالي فوق الخمس سنين ) و من أول مابتديت أدخن لحد مابطلت ماكنتش بادخن غير مارلبورو أبيض و جربت المصري و الأمريكاني و دول الأتحاد الأوروبي و جنوب شرق أسيا و اللي مصنوع في أمريكا للتصدير أجدع مارلبورو هو المصنوع في مصر و أسوأهم هو المصنوع في أمريكا للأستهلاك المحلي و دة من ضمن الأسباب اللي ساعدتني أبطل دة يا راجل حتى الكليوباترا تبغ محترم بالمقارنة بالمارلبورو المصنوع هنا و دة بشهادة الأمريكان اللي جربوها .
عمر لو عايز تسمع مغامراتي في المظلات عندي كتر , أبتديت من سنة 1987 و سبتها 1996 و تدرجت من برعم لقافز مخضرم لمدرب و قائد قفز .
أنا حرة:
اه صحيح انا نسيت الميكرسكوب شكلك كنتي زمل لينا
يالا ايام و بنعيشها
و اللة واحشني أكل البدة الأسكندراني على العربيات , أنا صحيح بأعملهل هنا و بتطلع 100% بس أكلها على العربية مزاج تاني خالص و بعد كدة كوزين مية ساقعة بالكوز الألامونيا من الأذان الألامونيا .
أة دايما بانسى أنا الكوبرا الحديدية صاحب التعليق اللي فوق دة ^^^^^^^
ironcopra
ههههههههههههههههههههههههههه
حلوه كوزين ميه ساقعه دى
منين يا مان
من انى زير
من الأذان الألمونيا با رأفت بس أنت هتعرف معنى أذان منين مانت شفت الجيش فيديو الأذان هو أنجر الامونيا كبير و ماتقوليش أنك ماتعرفش يعني أية أنجر .
من ضمن الناس المشهورة ملك الكبدة في ممر بابيك في وسط البلد و دة من معالم وسط البلد وضهر في فيلم ضربة شمس و رضا في الضاهر و زيزو نتانة في باب الشعرية
ironcopra
هههههههههههههههههههههه
انجــر ههههههههههههههههههه
ياعم هو فى ايه
وبعدين انا كنت بأتكلم على كبده اسكندرانى عند قهوه فاروق فى بحرى فى اسكندريه
عاوز انت تودينا باب الشعريه..
وهو فى حاجه تتاكل فى القاهـره يا سمسم
بص بأة يا رأفت الكبدة الأسكندراني يمكن تم أختراعها صحيح في الأسكندرية ( أو هذا هو ما أستخلصتة من الأسم ) لكن تم تنقيحها و تجويدها و تحسينها في القاهرة و زي ماقلت لك من أجدع الناس اللي تاكل عندهم كبدة زيزو نتانة في باب الشعرية و هو واقف بعريبتة زي الأسد و لا صلاح الدين في موقعة حطين في فيلم يوسف شاهين مش في فيلم ريدلي سكوت وضهرة للسور في أخر الحارة السد و المجاري طافحة أدامة و أنت داخل علية و أمعاءك تتمزق من الجوع في مشهد ميلودرامي مؤثر من نوعية الكلايمكس مثل رينو في الفيلم و جوفة يشتعل من العطش و يقول تريدني في الممر يا صلاح الدين أنا قدم أليك في الممر فتحس كدة أنك رينو و الجوع يمزقك مثلما كان العطش يمزقة و مية المجاري هي النار التي أشعلها جنود صلاح الدين و تعرف أنك سائر لحتفك مثلما سار رينو لحتفة لأنك لا تعرف ماذا وضع زيزو في ساندوتشات الكبدة والسجق لأن كل ما تشعر بة عندما تأكلها هو تلك النار التي تنفجر بداخلك لأن الساندوتشات لوديد بالشطة لأخفاء أي تحلل طرأ على الكبدة لكنها تلك العبثية القدرية الأغريقية مثل عبثية سيزيف تعرف أنك سائر لحتفك لكنك مازلت تسير ألية و عندما تقف أمامة (أعني زيزو وليس سيزيف رغم تشابة الأسماء ) ينظر في عينيك تلك النظرة الذئبية اللزجةالتي تشبة نظرة السفاح المتلذذ بقتل ضحيتة و يسألك شطة .
يتبع
الكوبرا الحديدية
أسف هو غالبا يقولها شتة بالتاء و ليس بالطاء
ironcopra
هههههههههههه
قول يامان
على الطلاق اللى انت بتقوله ده
تـــــــــــــاريــــخ
علشــــان عمــــــــــر
يرتاح ما هو اللى فتح سيــره الفول والفلافــل
كوبرا: منك لله يا شيخ! بقالي بالضبط ربع ساعة بضحك علي الفيلم الملحمي بتاع زيزو نتانة وموقعة الممر.. ياجدعان قلنا عندي مذاكرة الله يخرب بيوتك تقلوا دمكم شوية! وبعدين زوري قفش من كتر الضحك.. كشفت راسي ودعيت عليك يا ايرون يابن ام كوبرا
أصبر على رزقك يا باشا لسة الجزء الثاني من السيكول و دة لما تروح تشتري من رضا في الضاهر و أنت سهران سهرة أستميشن و لا سيرجنت و لا ترنيب و الشلة باعتاك تشتريلهم عشا وسجاير و هو بكا أشمئناط و شمم و تعالي يبصلك بأحتقار و يقولك خلاص شطبنا و لا كأنوة يعرفك و لا عمركوا كنتوا صحاب .
بزمتكم مش حاجة تقرف صحابي كلهم كانوا بياعين كبدة و حلاقين و ساعاتي , يعنوا واحد كان مصاحب علي حزوئة عايزاة يطلع أية وزير يعني على رأي الخالد اللمبي .
يا معجبين منير أنتوا عارفين أنة نزل ألبوم جديد هو مش بالظبط ألبوم هو أغاني و موسيقى فيلم دنيا.
منك لله يا عمر... كل ما أقول لنفسى هسيب الواد علشان يذاكر بقى!!! الاقى تعليق ليك يفطسنى على روحى من الضحك فاجى تانى اغتت عليك
:)
يالا.. روح كده وأنتا بتوحشنا
manal
يخرب بيت الخيال
إيه دا يا عم عمر
مش ممكن بجد حسيت إني واقف جمبك وهموت على الشندويش اللي ف إيدك
وهو بيشر زيته ومية الطرشي اللي بتنقط
يخرب بيت الحلاوة
حسستنا بجد أد إيه الفول دا نعمة
بس أنا بعد إذنك ما بحبش الطحينة وبتقلب لي معدتي جدا
ممكن سلطة خضرا بس وزود الطرشي حياة ابوك
اولا الموضوع جميل اوي اوي
تفاصيله الصغيرة خليته جميل اوي
و عيشت الجو بقي و بتاع و قلت يا سلام ع الحنين و مصر ام الدنيا
دخلت ع التعليقات
وخاصة الجزء الشهير بتاع زيزو نتانة
مش عايزة اقولك
باضحك و الله العظيم بدموع
ههههههههههه
صباح الفل يا بشوات
نفسي في ايه دلوقتي؟
اكون عند في بيت جدتي في المهندسين
وانزل اجيب الطلبات مع جدو اللي جدتي كتبتها
وننزل نروح الحسين وخان الخليلي سوا انا وهي
و بالليل قاعدين في البلكونة بناكل لب اسمر و نبص ع الناس في الشارع
ممكن؟
:)
عمر
بساطة الكلمات كانت مشجعة بصورة لا تقاوم خلتنى احس انى عايزة اقول انا نفسى فى ايه
لكن لما وصلت لاخر البوست حسيت ان مجرد تحقيق امنية بسيطة يعقبه راحة الموت كان احساس غريب
اد ايه كلنا امنياتنا بسيطة ونقدر ببساطة نحققها لو فيها سعادتنا ومع ذلك كلها بتفضل امنيات
نفسى اعمل حاجات بسيطة كتير من غير ما حد يقولى انت بتعملى ايه وليه
تحياتى
كوبرا: هو لسه فيه تاني؟ إديني يا معلم في العضل.. ماهي بايظة بايظة.. الله يخرب بيت التدوين علي اللي عايز يدون
منال: يا جميل انت تنور البلوج في أي وقت .. الا أخبار التطهير العرقي معاكي ايه اليومين دول؟
حج جرجس: منور.. طبعا يا ريس الفول نعمة واللي يكرهها يعمي.. يعني تخيل دلوقتي لو حطوا قدامي طبق فول سخن مولع غرقان في الزيت والطحينة وعليه رشة شطة كدة من فوق وجنبه رغيفين عيش بلدي سخن طالعين من الفرن بمساميرهم.. ومعاهم فحل بصل أخضر.. وواقفة الناحية التانية أجمل ست وفي العالم؟
طبعا حسيب الفول وأروحلها بديهي يعني..
تاخد شوية بتنجان؟
epi
ألف شكر علي التعليق.. طبعا طبعا طلبك موجود بس انتي املي استمارة وروحي اختميها من عند الرأفتاني وخدي إخلاء طرف من منال وهاتيهولي
tota
عارفة احنا كل واحد فينا حتي لو مش واخد باله عارف انه ممكن يموت في أي لحظة.. لكن الإحساس دة بيتضاعف عشرات المرات خارج الوطن.. ولذلك فجزء من الإحساس بالأمان اللي بيفتقدوا الشخص في وطنه هو احساسه بانه في المكان الذي يريد ان يموت فيه.. طبعا دي مجرد نظرية! وأتمنالك تعملي كل الحاجات الصغيرة الجملية اللي نفسك فيها
منال: التعليق اللي فوق دة علي طول حيعجبك قوي.. ابقي اقريه بالراحة كدة وانتي بتشربي شاي العصرية في الفيراندا
:)
انا بقى نفسي اكون قاعدة على قهوة الفيشاوي من زاوية اشوف فيها مئدنة مسجد سيدنا الحسين و هوا البخور جاي من ناحية مخلوط بطراوة الرطوبة و ريحة المكان القديمة اللي في ثواني بتحسسك انك رجعت 300 سنة لورا في عصر القاهرة الفاطمية القديمة
و ريحت كبابجي الدهان القديك تخش نخاشيشك فتخليك تقول
ححييييييييي
من جوه لانك من بره مسطول بالمعسل بتاع القهوة و مكسل تتكلم
و اقوم بعد كده اتمشى جوه الخان لغاية ما اتهوه و معرفش انا فين لكن بقرة قادر الاقي نفسي قدام قهوة نجيب محفوظ فادخل تاني اقعد استمخ تاني بشيشة شيك و عصير ساقع يبرد وشي الحران في صيف القاهرة الخانق
و افضل تايهه لغاية ما تلفون ماما يجي يصحيني
امتى حرجع البيت و انه كفايه سرمحهة بقى
اهئ اهئ اهئ
فتحت عليا المواجع يا اسمك ايه
هو انا ناقصة
حفصة: تصدقي بقي انت آخر مزاج.. المرة الجاية ابقي خديني معاكي والنبي.. واقفلي الموبايل
عارف يا عمر
كلامك ده توغل في وجداني خلاني اخاف بزيادة
بقالي يومين اساسا بقول طيب افرض مت هنا في امريكا طيب ايه حيحصل ساعتها؟
مش متخيلة انهم حيدفنوني هنا مثلا
يعن يتبقى غربة و انا عايشة و غربة و انا ميتة
طيب لو انا مت هنا الناس حتعرف عني ازاي؟
معلش شوية امينة رزق لكن انت السبب بقى تستاهل
سلام
عمر... ايه الكلام الجميل ده؟! مزجتنى والله يا بنى!! شكلك اتعديت منى ولا ايه؟
ما علينا.. المهم أنت كده حطيت رجلك على أول الطريق.. برافو عليك
:)
وبالنسبة للتطهير العرقى فهو الحمدلله ماشى تمام بس محتاجين شوية ديتول
:) :) :)
أنت مش متابع أخبار الدولة الرأفتانية ولا ايه؟
manal
حفصة ومنال
يا حلاوة! يا جدعان الساعة خمسة الصبح في القاهرة.. انتوا شكلكوا انتم الاتنين مدمنين كافيين وقاعدين قدام الانترنت تشموا البن وترزعونا كومنتات
حفصة: فعلا أنا اللي جبتوا لنفسي
:)
بس انا متفق معاكي
منال: لأ الحقيقة انا استقلت بعد ما عرفت ان الوزارة كلها حتبقي حريمي زي متقولي كدة رأفت عمل انقلاب داخلي علي الرجالة.. بس يا منال انا كنت بسألك عن التطهير العرقي اللي هي الإبادة الجماعية وملهاش علاقة بالعرق اللي بينتج عن الحر والزنقة في مترو الأنفاق.. ديتول إيه بس يا بنتي؟
ايوه يا بنى... هو فيه أجمل من قاعدة الفجر دى!! اخر مزاج
أنا أساسا بفضل نايمة طول النهار وأجى أصهلل بليل.. أروح الجامعة وأجى أنام
ثانيا أنا مش بحب القهوة! أنا اخرى شوكولاتة
:)
manal
ما أنا عارفة أنك قصدك ابادة جماعية.. بس زى ما أنت عارف الديتول بيستخدم للقضاء على البكتيريا والفيروسات والحشرات.. فمفرقتش كتير لو استخدمناه مع الشعب
ايوه يا عم... رأفت تلاقيه هايص دلوقتى فى الوزارة الحريمى اللى هو عاملها دى
:)
manal
صباح الخي ريا عم ر
انا في امريكا
فجرية ايه
صبح صبح
اول ما قلت نفسك في ايه تعرف قلت ايه قلت اروح الحج فعلا و الله نفسي في حجه او عمره و كل ما تيجي الايام دي اشتاق اكثر ادعو الله لنا بالزياره
يا ريت تزورني عشان في حاجه جديده
حفصة: هاهاهاها آه صحيح دة ايه الهطل الأزلي دة؟ معلش أصلي كنت عامل دماغ مذاكرة
نهر الحب: منورة.. فينك من زمان؟ حاضر يا ستي انا جايلك المدونة بس شوفي كدة لايكون حد خالع راسه ولا حاجة
منال: يا سلااااااام! والله بتتعبي عشان خاطر الشعب.. مش عارفين كنا عملنا ايه من غيرك.. اجيبلك فنيك أحسن؟
مصطفي: الف شكر يا درش.. والنبي لما القلة المندسة تجهز ابقي اديني رنج عشان انا مندس خلقة
أنا قررت خلاص- بما أنى وزيرة الاعدام والموتى- أن عمر وريث الدولة الرأفتانية هيبقى تحت حمايتنا وعنده حصانة كاملة.... يعنى من الاخر اللى هيقرب منه, هارمى على وشه مية طرشى
:) :)
manal
:)
مية طرشي مرة واحدة! دانتي فعلا وزيرة مرعبة جدا! واضح ان انا جوعتك بسبب البوست الأخير
This comment has been removed by the author.
يوم الخميس إن شاء الله.. علامات تجارية يا مان مش تجارة دولية! معلش بأة مانت مش فاضيلنا بقيت راجل زعيم
ربنا يصلح لك الحال..وتعدى
ِعلى فكرة حد يعرف مين هو أديب الشباب محمود عبدالرازق عفيفي دة بالضبط أو قرأ لة أي حاجة أنا بأشوف الجرافيتي بتاعة من ساعة ما أبتديت أروح نواحي مصر الجديدة عشان الكلية سنة 1986 بدأ بجدران سور مترو مصر الجديدة من الداخل و أنتهاء بمترو الأنفاق و كرهتة للة في للة من غير حتى ما أعرفة لسببين للتشوة و الأذي البصري اللي مسببة ثانيا لأنة باين علية هوبا أستنجلينا .
أيوة ياجدعان أنا الكوبرا الحديدية ماعرفش أية اللي حصل تاني
محمود عبدالرازق ده قريب جمــال الدولى بتاع اسكندريه
يعنى على نفس المنهج
انا بس كنت زهقان شويه, قلت احود على الوريث
ويا طالعه من باب الحمام
وكل خد عليه خوخه
خوخه خوخه خوخه
دربتى لخمه واخدتى زكام
ورابطه راسك م الدوخه
دوخه دوخه دوخه دوخه
يخرب بيت سنينكم جوعتوني و انا متعشية مرتين لحد دلوقتي
كبدة و فول و طعمية سوا
--
انا نفسي اقوم انام 8 ساعات على بعض
---
بس بجد بوست لذيذ و تعليقات الذ
تحياتي لك يا عمر انت و انا حرة و كل البلوجرية
رأفت
لا حول ولا قوة الا بالله.. كل ده من مسئوليات الممملكة؟
خير يا زعيم؟ أنت سخن ولاحاجة؟
خوخة ايه ودوخة ايه.. كده الشعب هيفقد ثقته فيك
عمر
حضر نفسك يا وريث شكلك هتمسك المملكة قريب
:)
أنت كمان عندك امتحانات؟!! ده ايه القرف الدولى اللى احنا عايشيين فيه ده؟
يالا.. ربنا معاك يابنى
manal
أنا نفسي أطير لباريس لأرى شخصا غالي
يا جماعة عايزين كلنا كده نقف فى ميدان التحرير ونرفع ايدينا بالدعاء لعمر.. علشان ربنا يوفقه فى امتحان النهاردة
:)
يارب تكون عملت كويس
عجبتك الكنافة؟
:)
manal
ومانقفش فى ميدان المنشيه ليه؟
وحش ميدان المنشيه
انت روحت فين يا صديــــــــق
انا اتصلت بيك مرتين
اتخن امتحان خدناه كان ساعه ونصف
انت هتقلقنا ليه يا مان؟؟؟
اوعى تكون تراجع الامتحان مع البنت الروسيه..؟؟؟؟؟؟
عمر.. أنت فين يا بنى؟ أنا شوفت تعليقك عند رأفت
ها.. طمنى.. عملت ايه فى الامتحان؟
:)
manal
منال: مفيش والله انا دخلت الامتحان حطوا ورقة الأسئلة قدعت أكتب لمدة 3 ساعات.. ايه بقي اللي كتبته؟ ما عنديش أي فكرة! عموما كل شئ حينكشفن ويبان
وشكرا عالسؤال يا جميل
ربنا يستر ومتكونش متأثر بالحاجات اللى كنت بتقرأها عند رأفت
:)
خير أن شاء الله.. طول ما أنت خارج من الامتحان ومش عارف أنت كتبت ايه يبقى حليت كويس.. أسألنى أنا عالموضوع ده
:)
manal
بركاتك يا شيخة منال.. يعني طريقي أخضر؟
طيب انا مرة دخلت امتحان وشوفت ايه... خير اللهم اجعله خير... قال ورقة الإجابة بيييييييضضضضااااااااااااااا مافيهاش ولا خط غامق.. بس وخلص الامتحان علي كدة
تفتكري خير برده؟
كلبوزة: شكرا عالزيارة انا دايما متابعك بس العملية قالبة معاكي سواد شوية اليومين دول مش عارف ليه
:)
tazart
منور
heyy just checking how did u do in the exam ????
ما علينا: اهلا اهلا ايه النور دة؟ والله مانا عارف عملت إيه..انا قعدت اكتب لمدة 3 ساعات واعتقد اني كنت بهلوس.. بس اختك منال بتقول ان الهلوسي في الحلم خير.. يعني طريقي اخضر في اخضر
ازيك يا ابني مش عارفة سمعت سيرة امتحانات
ايه وجع البطن دة
الله يخربيت الامتحانات علي اللي اخترعوها
ربنا يعينك يراب ويفك زنقتك
ههههههههه
زنقة الامتحانات مش زنقة تانية
ربنا معاك وابقي طمني اول باول احيات ابوك
This comment has been removed by the author.
كل الى نفسه فى حاجه حلها سهل اوى انه يرفع ايده للسماء و يقول يا رب و الله عز و جل يرد يقوله لبيك عبدى و ان شاء الله الدعاء يكون مستجاب
و اشطه عليكم يا رجاله انا دخلت على الموقع ده بالحظ بس عجبنى كلامهم :)
انا قريت مدونتك بالصدفة البحتة و عجبني فيها المواضيع و ماعجبنيش الاطالة ارجو انك تزور مدونتي و تقبلني عندك و ياريت اشوف ردودك و تعليقاتك عندي و يا رب نكون متابعين بعضنا دايما و ده اللينك بتاع مدونتي
http://malekelkebda.blogspot.com/
Post a Comment
<< Home